تعالوا نشوف موضوع اللحية باسلوب علمى بسيط

استعرض الموضوع السابق استعرض الموضوع التالي اذهب الى الأسفل

تعالوا نشوف موضوع اللحية باسلوب علمى بسيط

مُساهمة  Admin في الجمعة أبريل 13, 2012 3:41 pm

السلام عليكم ورحمة الله وبركاته
اخواني في الله

المرة دي الموضوع اللي هكتبه موضوع الكلام كتر فيه اوي
وفيه بعض الناس مش عارفين يروحوا فين
يسمعوا كلام مين
فحبيت أوضح الموضوع وهو حكم اللحية بأسلوب علمي أصولي وسهل وإن شاء الله كل الاخوة هنا تفهمه

الاول قبل ما أشرح الموضوع
اللي بنسمعه في حكم اللحية هو يا اما هي واجب أو فرض أو سنة
عايزين الاول نعرف الفرق بين ال3 كلمات دول

الفرض والواجب : هو الشئ الذي إذا فعلته تثاب عليه وإن لم تفعله عوقبت علي تركه
السنه أو المستحب : هو ما يثاب علي فعله ولا يعاقب علي تركه

طب فيه فرق بين الواجب والفرض؟
لا ما فيش فرق عند الجمهور إلا عند الحنفيه
والفرق بينهم عند الحنفية ما يهمناش أوي كناس عاديين مش علماء
لأن الفرق بينهم بيكون في الثبوت
يعني لو الحكم ثابت بدليل قطعي الثبوت ( يعني آية أو حديث متواتر ) يبقي فرض عند الحنفيه
ولو الحكم ثابت بدليل غير قطعي الثبوت ( يعني حديث آحاد ) يبقي واجب
هو ده بس الفرق
لكن من ناحية الثواب والعقاب هو هو

ندخل بقي في الموضوع

الحديث اللي مشهور أوي في موضوع اللحية هو الحديث اللي رواه البخاري ومسلم
قال رسول الله صلي الله عليه وسلم ( خالفوا المشركين . أحفوا الشوارب وأوفروا اللحي )
والحديث ده فيه أحاديث زيه كتير اوي في المعني ومن طرق كتير اوي

المهم

نستنتج ايه من الحديث ده؟

فيه قاعدة بتقول :
الأمر للوجوب ما لم تأت قرينة تصرفه عن الوجوب

يعني ايه ؟
يعني لو ورد في حديث أو آيه أمر من الله أو من رسوله صلي الله عليه وسلم يبقي الامر ده فرض ولازم كل مسلم يعمله وإلا هيتعاقب إلا لو فيه دليل تاني بيخفف من الحكم من الوجوب الي اي شئ تاني


و القاعدة دي هي مذهب الائمة الاربعه
طب ايه الدليل علي كده؟
قال النبي صلي الله عليه وسلم
( لولا أن أشق على أمتي، أو على الناس لأمرتهم بالسواك مع كل صلاة ) رواه البخاري
فلو كان أمر النبي صلي الله عليه وسلم معناه الاستحباب بس يبقي السواك مفيهوش مشقة لو كان النبي صلي الله عليه وسلم أمر بيه
لأنك لو تركت المستحب مش مشكلة
وضحت كده؟

طب حديثنا ده ايه نظامه

زي ما احنا شايفين قول النبي
( أوفروا و أحفوا ) فده أمر في الحديث يبقي الامر للوجوب

كذلك فيه أمر تاني وهو (خالفوا) ولا شك أن مخالفة المشركين واجبة في الحديث ده لأن مفيش دليل تاني يصرف المخالفة في الحديث ده عن الوجوب
والنبي قال في الحديث ده أن توفير اللحية فيه مخالفة للمشركين
وفيه قاعدة تاني بتقول ( الوسائل لها أحكام المقاصد )
والمقصد هو مخالفة المشركين
والوسيلة هي اطلاق اللحية
وبما أن المخالفة واجبة يبقي اطلاق اللحية واجب

توهتوا ولا لسه؟

طب يا تري فيه قرينه في الموضوع ؟
لا مفيش خالص وهتشوفوا دلوقتي في الرد علي المخالفين

كده يبقي احنا عرفنا ان إطلاق اللحية واجب

طب المخالفين بيقولوا ايه بقي؟

1- بيستدلوا بحديث سنن الفطرة

والحديث ده في الحقيقة مفيهوش أي نوع من الاستدلال
مش معني أن النبي صلي الله عليه وسلم قال أن الحاجات دي سنن يبقي معناها معني السنة عند الفقهاء
لأن المصطلحات دي ( سنة ومستحب وفرض وواجب ........ الخ ) ظهرت بعد موت النبي صلي الله عليه وسلم بفترة طويلة
غير كده
فيه بعض الحاجات في الحديث ده واجبة
زي مثلا الختان بالنسبة للرجال معظم العلماء من السلف والخلف قالوا انه واجب في حق الرجال ومختلف فيه في حق النساء بين الاستحباب والوجوب

يبقي الحديث مش بيدل علي ان الحاجات دي مجرد مستحبات بل منها واجب

2- بيستدلوا برضه بحديث النبي صلي الله عليه وسلم اللي رواه البخاري وهو
(إن اليهود والنصارى لا يصبغون، فخالفوهم)

اللي يبص علي الحديث ده يلاقيه فعلا مشابه للحديث بتاع اللحية اوي
طب ايه الرد ؟
الرد هو أن فيه قرينه في الحكم
وهو أن بعض الصحابة كانوا مش بيصبغوا معني كده ان الصحابة فهموا الامر ده علي انه مش للوجوب
ورأي الصحابي من الادلة الشرعية في أصول الفقه

باقي شبهة واحدة وهي حلق اللحية يجوز في سبيل الدعوة
واعتقد ان الحتة دي محتاجة موضوع لوحده انتظروه قريب اوي ان شاء الله لأني كده طولت عليكم اوي

أحب أقول بس في الاخر أن موضوع اللحية ده يكاد يكون فيه إجماع إلا انه ما وصلش لدرجة الاجماع
لكن ده رأي كل العلماء تقريبا إلا القليل جدا باستثناء علماء عصرنا الحالي
وده رأي الائمة الاربعه وعلماء الحديث

اعتقد أن الموضوع كده أصبح واضح جدا

جزاكم الله خيرا علي الصبر علي قراءة الموضوع

Admin
Admin

المساهمات : 205
تاريخ التسجيل : 12/04/2012
العمر : 39
الموقع : http://tawfikia.ibda3.org

معاينة صفحة البيانات الشخصي للعضو http://tawfikia.ibda3.org

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى